កម្ពុជា៖ ថៃកំពុងដណ្ដើមកាន់កាប់ប្រាសាទតាមាន់

2011-04-24 ប្រទេសកម្ពុជា និងថៃកំពុងចោទដាក់គ្នាទៅមកអំពីការផ្ដើមប្រយុទ្ធគ្នា ចូលដល់ថ្ងៃទីបីនៅតំបន់ប្រាសាទតាមាន់ខេត្តឧត្តរមានជ័យ។ អ្នកនាំពាក្យក្រសួងការពារជាតិកម្ពុជា ចេញសេចក្ដីប្រកាសព័ត៌មានថា កងទ័ពថៃបាញ់ជញ្ជ្រំកាំភ្លើងធំ និងការវាយសម្រុកដោយកម្លាំងទ័ពថ្មើរជើងនៅព្រឹកថ្ងៃអាទិត្យទី ២៤ មេសា គឺដើម្បីកាន់កាប់ប្រាសាទតាមាន់។ រហូតមកដល់នេះ កងទ័ពកម្ពុជាកំពុងប្រយុទ្ធការពារទីនោះ។ នាយករដ្ឋមន្ត្រីថៃ លោក អាភីស៊ិត វ៉េតចាជីវ៉ាក់ ថ្លែងថា ថៃគ្មាននយោបាយរករឿងប្រទេសជិតខាងទេ ហើយការប្រយុទ្ធគ្នាជាថ្មីនេះបានចាប់ផ្ដើមឡើងដោយភាគីកម្ពុជា ហើយកងទ័ពថៃចាំបាច់ត្រូវតបតវិញដើម្បីការពារប្រជាពលរដ្ឋរបស់ ខ្លួន។ លោកបញ្ជាក់ថា «យើងតម្រង់ដាក់តែគោលដៅយោធាប៉ុណ្ណោះ»។ សេចក្ដី ប្រកាសព័ត៌មានអ្នកនាំពាក្យក្រសួងការពារជាតិកម្ពុជា សរសេរថា ថៃបាញ់ផ្លោងអាវុធធុនធ្ងន់រាប់រយគ្រាប់ចូលតំបន់គោកមន ស្រុកបន្ទាយអំពិល ខេត្តឧត្តរមានជ័យ ដែលជាតំបន់ពលរដ្ឋស៊ីវិលកំពុងរស់នៅ។ សម្លេងគ្រាប់ផ្លោងជាច្រើន គ្រាប់ បានផ្ទុះឡើងជាថ្មីម្ដងទៀត នៅព្រឹកថ្ងៃអាទិត្យទី ២៤ ខែមេសានេះ នៅតំបន់ប្រាសាទតាមាន់ និងតាក្របី ដែលជាចំណុចសមរភូមិប្រយុទ្ធគ្នារវាងកងទ័ពកម្ពុជា និងថៃ រយៈពេលពីរថ្ងៃ កាលពីថ្ងៃសុក្រ និងថ្ងៃសៅរ៍។ អ្នកយកព័ត៌មាន វិទ្យុអាស៊ីសេរីបានរាយការណ៍មកថា ស្នូរគ្រាប់កាំភ្លើងបានផ្ទុះឡើងនៅម៉ោង ៩ និង ៤៥ នាទី បន្តរហូតមកដល់ម៉ោង ១២ ថ្ងៃត្រង់មានចំនួនជាង ១៣០ គ្រាប់។ ប្រភពព័ត៌មានពីទីបញ្ជា ការទិសឧត្តរមានជ័យបានឱ្យដឹងថា កងទ័ពថៃនៅច្រកប្រាសាទតាមាន់ចំនួន ៧ នាក់របួស និងម្នាក់ទៀត ដែលជាប្រធានទំនាក់ទំនងច្រកនេះ បានស្លាប់នៅមន្ទីរពេទ្យ។ មិនទាន់មានរបាយការណ៍អំពីការខូចខាតខាងខ្មែរនៅឡើយទេ៕