2011-04-21
តំណាងដៃគូអភិវឌ្ឍន៍រដ្ឋាភិបាលកម្ពុជា ជាប្រទេសម្ចាស់ជំនួយកម្ពុជា ក្នុងវេទិកាពិភាក្សាតាមដានការអនុវត្តការសន្យារបស់រដ្ឋាភិបាលកម្ពុជា កាលពីឆ្នាំ២០១០ បានព្រមានថា ជំនួយអភិវឌ្ឍន៍កម្ពុជា នឹងត្រូវកាត់បន្ថយ ប្រសិនបើរដ្ឋាភិបាលអនុម័តសេចក្ដីព្រាងច្បាប់សមាគម-អង្គការ មិនមែនរដ្ឋាភិបាល។
ទង់ជាតិរបស់សហរដ្ឋអាមេរិក
មន្រ្តីទីភ្នាក់ងារសហរដ្ឋអាមេរិកដើម្បីការអភិវឌ្ឍអន្តរជាតិ (USAID) ប្រចាំនៅកម្ពុជា កាលពីថ្ងៃពុធ ទី២០ ខែមេសា បានព្រមានរដ្ឋាភិបាលក្រុងភ្នំពេញថា សហរដ្ឋអាមេរិកបានប្ដេជ្ញាចិត្តចំពោះការជួយអភិវឌ្ឍប្រទេសកម្ពុជាបន្ថែមទៀត ប៉ុន្តែសហរដ្ឋអាមេរិក នឹងពិបាកបង្កើនជំនួយបន្ថែម ប្រសិនបើតួនាទីរបស់អង្គការសង្គមស៊ីវិលនៅកម្ពុជា កាន់តែរួមតូចបន្ថែមទៀត។
ក្នុងសុន្ទរកថារបស់នាយកបេសកកម្មទីភ្នាក់ងារជំនួយសហរដ្ឋអាមេរិក USAID លោក ហ្វ្លីន ហ្វូល្ល័រ (Flynn Fuller) ថ្លែងទៅកាន់អ្នកចូលរួមកិច្ចប្រជុំដៃគូអភិវឌ្ឍន៍ បានសម្ដែងក្ដីបារម្ភចំពោះសេចក្ដីព្រាងច្បាប់គ្រប់គ្រងអង្គការ និងសមាគមមិនមែនរដ្ឋាភិបាលថា ច្បាប់នេះនឹងធ្វើឲ្យគ្រោះថ្នាក់ដល់លទ្ធភាពអង្គការសង្គមស៊ីវិលជាដៃគូអភិវឌ្ឍន៍របស់រដ្ឋាភិបាលក្នុងការជួយរដ្ឋាភិបាលដើម្បីអភិវឌ្ឍន៍កម្ពុជា។
លោក ហ្វ្លីន ហ្វូល្ល័រ បន្ថែមទៀតថា សហរដ្ឋអាមេរិកមានបំណងចង់ជួយកម្ពុជា ប៉ុន្តែបើសកម្មភាពរបស់អង្គការសង្គមស៊ីវិលត្រូវបានរឹតត្បិតនោះ សហរដ្ឋអាមេរិកប្រហែលជាពិបាកនឹងបង្កើនជំនួយសម្រាប់កម្ពុជា។
អង្គការ USAID កំពុងនិងបានធ្វើការងារនៅកម្ពុជា ជាមួយអង្គការសង្គមស៊ីវិលប្រមាណជាង ១០០អង្គការ ទាក់ទងនឹងវិស័យអភិបាលកិច្ច ដូចជាផ្នែកសុខភាព អប់រំ និងការទប់ស្កាត់អំពើជួញដូរមនុស្សជាដើម។
កម្មវិធីរបស់ USAID បានជួយកាត់បន្ថយអត្រានៃការឆ្លងមេរោគ (HIV) និងការផ្ដល់ថ្នាំពន្យារជីវិត។ កម្មវិធីនេះក៏បានជួយទប់ស្កាត់ និងព្យាបាលអ្នកជំងឺរបេងនៅកម្ពុជា ផងដែរ។ ពលរដ្ឋខ្មែរប្រមាណ ៦៤% កំពុងប៉ះពាល់ដោយសារជំងឺរបេង។
លោក ហ្វ្លីន ហ្វូល្ល័រ ក៏បានស្នើឲ្យរដ្ឋាភិបាលពិនិត្យអំពីភាពចាំបាច់នៃសេចក្ដីព្រាងច្បាប់គ្រប់គ្រងអង្គការ និងសមាគមមិនមែនរដ្ឋាភិបាលសាជាថ្មីម្ដងទៀត។ ប្រសិនបើមានភាពចាំបាច់ រដ្ឋាភិបាលកម្ពុជាត្រូវតែកែប្រែមាត្រាមួយចំនួនក្នុងសេចក្ដីព្រាងច្បាប់ ដើម្បីកាត់បន្ថយការរឹតត្បិតសិទ្ធិសេរីភាព និងសកម្មភាពអង្គការសង្គមស៊ីវិលក្នុងការបំពេញតួនាទីរបស់ពួកគេ។
ក្នុងកិច្ចប្រជុំកិច្ចសហប្រតិបត្តិការអភិវឌ្ឍន៍កម្ពុជា ឬកិច្ចប្រជុំស្វែងរកជំនួយបរទេស កាលពីខែមិថុនា ឆ្នាំ២០១០ លោក ហ៊ុន សែន បានសន្យានឹងតំណាងប្រទេសម្ចាស់ជំនួយថា លោកនឹងប្ដេជ្ញាធ្វើកំណែទម្រង់ស៊ីជម្រៅ និងបន្តការប្រយុទ្ធប្រឆាំងនឹងអំពើពុករលួយជាទិសដៅអាទិភាពរបស់រដ្ឋាភិបាល។ លោក ហ៊ុន សែន ថា កំណែទម្រង់ស៊ីជម្រៅជាបញ្ហាស្លាប់និងរស់។ ក្រោយពីការសន្យានេះ ម្ចាស់ជំនួយបានផ្ដល់ជំនួយឲ្យកម្ពុជា ប្រមាណជាង ១ពាន់លានដុល្លារ។
រដ្ឋាភិបាលកម្ពុជា នៅមិនទាន់បានបង្ហាញពីជំហរខ្លួនទាក់ទងនឹងក្ដីកង្វល់របស់ម្ចាស់ជំនួយ អំពីសេចក្ដីព្រាងច្បាប់មានបញ្ហានេះនៅឡើយទេ កាលពីថ្ងៃពុធ។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក គាត ឈន់ ជាប្រធានកិច្ចប្រជុំការពិភាក្សាតាមដានការសន្យារបស់រដ្ឋាភិបាលកាលពីឆ្នាំ២០១០ បានមានប្រសាសន៍ថា លោកទុកចិត្តលើក្រសួងពាក់ព័ន្ធ ជាពិសេសរដ្ឋមន្ត្រីក្រសួងមហាផ្ទៃ ក្នុងការដោះស្រាយលើបញ្ហាទាំងឡាយដែលប្រទេសម្ចាស់ជំនួយបានសម្ដែងក្ដីកង្វល់៕
Post a Comment